Nau mai ki ngā rokiroki o Te Whanake

Tēnā koe. Kei tēnei paetukutuku ngā mahi whakarongo, kōrero hoki, o ngā pukapuka matua e whā o Te Whanake. He rauemi ēnei mahi hei āwhina i te akonga ki te whakapakari i ngā pūkenga whakarongo, kōrero hoki i te reo Māori mai i te tīmatanga tae noa ki te wā e matatau ana te tangata ki te reo Māori. Kei runga hoki ēnei rokiroki (kōnae ipurangi rānei) i ngā rīpene whakarongo, i ngā kōpae pūoro, i ngā rīpene whakaata anō hoki.

He maha ngā painga o te whakawhiti o ngā rīpene whakarongo me ngā rīpene whakaata ki te ipurangi hei āwhina i ngā ākonga, i ngā kaiako me ngā whakanōhanga e whakaako ana i te reo Māori, arā

• Ka taea e ngā ākonga ngā mahi te whakaoti i te ipurangi, ā, kāore he utu.
• Mehemea he hopuoro a ngā ākonga e honoa ana ki ā rātou rorohiko, ka taea e rātou ngā whakautu te hopu, ka tuku ai ki ō rātou kaiako mā te ipurangi kia tere ai te māka me te tohutohu. Ka taea ā rātou mahi te tuku mā te ipurangi ahakoa kei hea rātou i te Ao.
• Mehemea he hopuoro a ngā kaiako e honoa ana ki ā rātou rorohiko, ka taea e rātou ngā mahi a ngā ākonga te māka me te tohutohu ka tuku ai ki ngā ākonga mā te ipurangi, ahakoa kei hea rātou i te Ao.
• Nō reira, ka taea ngā whakawaiwai reo te whakakore hei ako i te reo Māori.

He āhuatanga nui whakaharahara tēnei mō te ako me te whakaako i te reo Māori.

Mehemea kei te ako koe i te reo Māori he āwhina ēnei mahi i a koe ki te ako i ngā kōrerorero, i ngā kupu hou me nga momo whakatakotoranga kupu o ia wāhanga.